......

فليلة من الليالي
حضرني حلم جميل
وسط البيت الخالي
سمعت خبار الخير
من النعاس فيقت خيالي
وهمت على جناج الطير
قلتلو انا ملكك يا غالي
سبقني وانا وراك نسير
نسجنا ملحف من سواد الليل
مشينا و جينا شي الف ميل
على ظهر الهوى ماشي على ظهر الخيل
لمحت من بعيد شمعة ضاوية
وسط سما كلها نجوم
لمحت ناس قلوبهم صافية
وعشرتهم كاملة دوم
شافوني وسولوني
شكون نتي ا البنية
بوجوههم البريئة طمنوني
جاوبت :انا تايهة و من دارنا مجلية
بكات الشمعة عليا
و الجمرة واستني
الخيل لطفت بيا
والطيور عزاتني
انا ريحانة
الهاربة من قصر الامير
انا رمانة
كنقلب على سيدي سحت الليل
فينكم يا حبابي وصحابي
يا معشر الكرم و الخير
فينكم يا اهلي وجيراني
نزلوني من على جناح الطير
سمعت صوت بعيد بوداني
كيقول :
يا ويح من طاح فبير
وصعاب عليه طلوعو
رفرف ما صاب جنحين
بكا ما نشفو دموعو
ااااه عليك يا دنيا يا غدارة
العيشة فيك لذيذة وخا فيها مرارة
واحد فالبير العميق كينوح
وانا فالسما العاليا باحزاني كنبوح
لازمني حبل طويل
ننقد اللي راه مرمي فالبير
اشنو ندير؟
تلفت ولقيت مرى شيبانية
تبسمتلي وقالتلي اجي ا البنية
شوفتها سخونة حامية
صورتها منورة ضاوية
صوتها بحال بحيرة دافيا
ضمتني لصدرها وقالت:
البير حسن ليك من السما العالية
رماتني وصرخت حتى عييت
خفت يكون مصيري خبيث
فقت على شروق شمس جميلة
تقلبت على سريري
و تعلمت من الشيبانية احسن حيلة
غطيت خيالي بملحف سميك
وانتهى كابوس هاد الليلة